CLXXIX.

1341, October 21. Kamenz.

Abt Sigehard und der Konvent des Klosters Kamenz verkaufen die Scholtisei in Dörndorf an Heinrich von Protzan.

In nomine domini amen. Sapientum provida decernit auctoritas, ut ea, que perhenni stare cupiunt in vigore, legittimis scripturarum documentis et hominum fidedignorum testimoniis roborentur. Proinde nos frater Syghardus abbas in Kamencz tenore presentium recognoscimus publice protestantes, quod dominus Tilo, quondam abbas, noster predecessor, de maturo nostri conventus consilio et assensu vendidit rite ac rationabiliter Heynrico de Proczano scultetiam nostram in Durrendorf cum universis et singulis infra scriptis, videlicet thaberna, pistrino, carnificio, fabrica sutoria, sartoria, tertio denario de iudicio et alterum dimidium mansum agrorum sub aratro videlicet tres virgas, ubi residet, quatuor virgas suo ex opposito, dimidium mansum iuxta agros plebani et quinque virgas a superiori parte ipsius ville situatas cum servitio mansorum secundum, quod hactenus habuit. Que omnia et singula dictus Henricus cum suis heredibus iure hereditario perpetuis temporibus libere possidebit, excepto, quod nobis novem scotos solvere ac dare debet pro servitio annuatim, mediam partem scilicet in festo Walpurgis et reliquam partem in festo beati Michaelis, addicientes, quod moderatum gregem ovium habere specialiter possit sine dampno ac sine preiudicio rusticorum. Nos vero de consilio nostrorum seniorum dictam vendicionem ratam et gratam habentes, predictam scultetiam cum universis et singulis superius expressis eidem Heynrico et suis heredibus liberaliter resignamus. Preterea ex speciali favore et gracia pro communi utilitate ville concedimus ibidem in villa piscinam fieri, ita tamen, quod scultetus pisces nobiscum dividat aliquando. In quorum omnium testimonium presentibus nostra sigilla sunt appensa. Datum in die Undecim milium virginum anno domini millesimo trecentesimo quadragesimo primo; presentibus fratribus nostris: Ticzcone priore, Tilone quondam abbate, Nicolao subpriore, Johanne cellerario, Arnoldo camerario, Johanne forestario et aliis multis de conventu.

Or. Perg. An Pergamentstreifen ein Fragment des Abtsiegels und das sehr beschädigte Conventsiegel, beide in rothem Wachs.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.